الكيس الدهني في الجفن: أسبابه وأعراضه وعلاجه

الكيس الدهني في الجفن، متى تقلق ومتى تطمّن

بشوف الحالة دي في العيادة تقريبا كل يوم. مريضة جاتني مرعوبة، عندها حاجة في الجفن العلوي من أسبوعين مش راضية تروح. أول حاجة قالتها: "يا دكتور ده ورم؟"، وده سؤال طبيعي، أي حد يلاقي كتلة قريبة من عينه هيخاف. طمّنتها: ده كيس دهني (Chalazion)، حاجة بسيطة وغالبا بتروح لوحدها.

إيه هو الكيس الدهني بالظبط؟

الكيس الدهني هو كتلة صغيرة بطيئة النمو بتظهر جوه الجفن. بيحصل لما غدة من غدد ميبوميان (Meibomian glands)، اللي موجودة على حافة الجفن ووظيفتها إنها تفرز مادة زيتية بتحمي سطح العين (وهي نفس الغدد اللي انسدادها المزمن بيسبب جفاف العين)، لما واحدة من الغدد دي بتتسد أو بتلتهب، الإفرازات بتتجمع وبتعمل الكيس.

في الغالب مش بيوجع. ممكن يظهر في الجفن العلوي أو السفلي، بس الأشهر إنه يظهر في الجفن العلوي.

أعراض الكيس الدهني

• في البداية بتظهر منطقة صغيرة حمرا أو ملتهبة في الجفن
• خلال أيام بتتحول لكتلة غير مؤلمة بتكبر ببطء
• ممكن العين تكون مائية ومتهيجة شوية
• لو الكيس كبر بيضغط على مقلة العين وممكن يسبب ضبابية بسيطة في الرؤية

شكل الكيس الدهني في العين، إزاي تعرفه؟

شكله المعتاد: كتلة صغيرة مدوّرة جوه الجفن، بتحسها تحت الجلد أكتر ما بتشوفها. في أول أيام بتلاحظ منطقة صغيرة حمرا أو ملتهبة، وبعدين بتتحول لكتلة ثابتة مش بتوجع وبتكبر ببطء. الجلد اللي فوقها غالبا شكله طبيعي، مفيش رأس صديد زي الدمل. ولو كبر، ممكن تحس إنه ضاغط على العين نفسها ويسبب ضبابية بسيطة في الرؤية.

الفرق بين دمل العين والكيس الدهني، مهم تفرّق

الناس بتلخبط بينهم كتير، بس الفرق واضح:

• الكيس الدهني (Chalazion)، مش بيوجع. بيجي من غدة ميبوميان المسدودة. بطيء النمو.
• دمل العين (Stye / Hordeolum)، بيوجع جدا. بيجي من التهاب بكتيري في بصيلة شعر أو غدة زيتية على حافة الجفن. بيكبر في ٣ أيام وبعدين الصديد بيتصرف وبيشفى في أسبوع تقريبا.

الدمل ممكن يصاحبه: تورم الجفن، حساسية للضوء، دموع زيادة، وقشور على حافة الجفن.

أسباب ظهور الكيس الدهني

غالبا بيظهر عند ناس عندهم حالة التهابية مزمنة بتأثر على الجفن أو الجلد:

• التهاب الجفن المزمن (Blepharitis)، وده السبب الأشهر، وكتير بييجي مصاحب لـجفاف العين
• حب الشباب الوردي (Rosacea)
• التهاب الجلد الدهني (Seborrheic Dermatitis)
• التهاب الملتحمة الفيروسي

وفي عوامل خطر تانية: العدوى الفيروسية، مرض السكر، وفي حالات نادرة جدا ممكن يكون مصاحب لمشاكل أكبر.

الكيس الدهني في جفن العين السفلي، مختلف عن العلوي؟

نفس الحكاية بالظبط. غدد ميبوميان موجودة في الجفنين العلوي والسفلي، فالكيس ممكن يظهر في أي واحد فيهم، الأشهر إنه يظهر في العلوي لأن عدد الغدد فيه أكبر، بس السفلي وارد برضه. الأعراض والعلاج مفيش فيهم أي فرق: كمادات دافئة جافة، ولو ما راحش في أسبوعين أو بيتكرر، تعالى نشوفه في العيادة.

العلاج في البيت، الكمادات الدافئة

أغلب الحالات بتتحسن في البيت. الكمادات الدافئة بتساعد تفتح القنوات المسدودة وتصرّف الزيت المتراكم:

1. الأفضل تستخدم كمادات جافة دافئة، البلل ممكن يزوّد التهاب الجلد حوالين العين
2. حط الكمادة على الجفن ١٠-١٥ دقيقة
3. بعدها دلّك الجفن بلطف لمدة دقيقتين عشان تساعد المجاري على التصريف
4. كرّر ده ٣-٤ مرات في اليوم لحد ما التورم يقل

مهم: متحاولش تعصر الكيس أو تفرّغه بنفسك، ده ممكن يسبب عدوى ويخلّي الوضع أسوء.

حاجات تجنبها

• مكياج العين لحد ما الكيس يشفى
• العدسات اللاصقة في الفترة دي
• لمس العين بإيد مش نضيفة

امتى تروح لدكتور العيون؟

لازم تيجي العيادة لو:

• الكيس مش بيروح بعد أسبوعين من الكمادات
• حجمه بيكبر مش بيقل
• فيه ألم شديد أو احمرار منتشر
• بيأثر على الرؤية
• بيتكرر في نفس المكان

العلاج الطبي والجراحي

لو الكمادات ما نفعتش، ممكن:

• قطرات أو مراهم مضادة للالتهاب عشان تسرّع الشفاء
• حقنة ستيرويد في الكيس، بتقلل التورم بسرعة
• مضادات حيوية لو في علامات عدوى بكتيرية

لو كل ده ما نفعش أو الكيس كبير ومزعج، بنعمل عملية تصريف بسيطة تحت تخدير موضعي. العملية بتاخد دقايق.

لو الكيس بيتكرر كتير في نفس المكان، ممكن ناخد عينة للتحليل عشان نتأكد إن مفيش حاجة تانية، ده إجراء احترازي مش أكتر.

الوقاية، عشان ما يرجعش تاني

• نضّف منطقة العين والجفون يوميا، في مناديل تنظيف جفون مخصصة
• متفركش عينك
• اغسل إيدك قبل ما تلمس عينك
• غيّر مكياج العين كل ٦ شهور عشان تمنع نمو البكتيريا
• لو بتلبس عدسات لاصقة، نظافتها أولا

الكيس الدهني في الجفن حاجة شائعة وفي الغالب بسيطة. لو شاكك في أي حاجة أو مش بيروح، احجز كشف وتعالى نطمّنك. للاطلاع على بقية المقالات اضغط هنا.